بالواضح كدا ما بالدس. ✍️ خالد ابوصالح
بالواضح كدا ما بالدس.
✍️ خالد ابوصالح
شفت في تركيا لما جاهم الزلزال بتاعين البقالات بفتحو بقالاتهم ويوزعوا للناس مواد تموينية مجان
شفت في المغرب لامن جاهم الزلزال الناس مشت بالملايين تساعد في رفع الانقاض وتبرعوا بكميات كبيره من المواد التموينية لدرجة ان المغرب اعتذرت لكثير من الدول اللي عرضت المساعدة لان الشعب وقف مع بعض..
اليوم التلفزيون الليبي يقول هناك اكتر من ٥٠ الف عربية جات محملة بالمواد الغذائية والشباب لمدينة درنة المنكوبة للمساعدة وتقديم يد العون..
وشفت شعب كدا شغال ينفخ في نفسه :
لو ما جيت من زى ديل وا اسفاي وا ذلي
والبقع بيناتنا بنسندوا
الشعب دا لما جاتو كارثة الحرب
الصابونة بقت ب٥ الف..واصحاب الترحيل نقلوا نساء واطفال من الخرطوم لامدرمان بسعر اعلي من العادى بمعدل مليون في المية والولايات الطرفية اللي نزح ليها بعض افراد الشعب دا اجرو ليهم بيوت الطين بإيجار شهري يعادل ضعف قيمة البيت لو حبيت تشتريهو في الايام العادية وشفت الجار قاعد يسرق جاره..والجار قاعد يبلغ عن جاره ليقبض ثمن التبليغ …
والعجيب ان الشعب دا قاعد يتسأءل وبراءة الاطفال في عينيه:
نحنا ليه البلاد من حولنا بتتقدم ونحنا متأخرين
